Gjykata e Apelit lë në burg Spiro Kserën

Gjykata e Apelit ka lënë në fuqi masën e arrestit me burg për ish-ministrin Spiro Ksera, i akuzuar për vjedhje duke shpërdoruar detyrën.

Ksera është paraqitur këtë të enjte në Gjykatën e Apelit për masën e sigurisë. Avokati i tij mbrojtës Genc Gjokutaj e ka quajtur vendimin e shkallës së parë për ‘arrest me burg’ në shkelje të ligjit.

Sipas Gjokutajt, gjykata nuk ka arsyetuar vendimin. “Në mbi një vit hetim Ksera nuk është thirrur asnjëherë në pozitën e ish- ministrit. Por edhe në momentin e ndalimit, prokurori kishte detyrim ta pyeste në cilësinë e të ndaluarit”, është shprehur avokati mbrojtës. Ai ka kërkuar që vendimi i gjykatës së Shkallës së Parë të Tiranës të shpallet i pavlefshëm.

Vetë ish-ministri u shpreh se nuk është person i rrezikshëm, ndërsa e quan të pavlefshëm hetimin. “Ministria ka bërë vetëm lidhjen e kontratës”, ka shtuar ai, ndërsa thekson se çështja ka qënë e monitoruar.