Gjykata refuzon paraburgimin për Gorski Matoviqin, i ndalohet afrimi me dëshmitarët
Gjykata Themelore në Novi Sad nuk i caktoi paraburgim deri në 30 ditë Gorski Matoviqit, të arrestuar për kërcënimet ndaj qytetarëve në ditën e zgjedhjeve, por i ndaloi afrimin dhe komunikimin me dëshmitarët dhe personat e dëmtuar.
Gjykata Themelore në Novi Sad ka refuzuar t’i caktojë paraburgim deri në 30 ditë Gorski Matoviqit, duke e lënë atë në liri me masën e ndalimit të afrimit, takimit dhe komunikimit me personat që janë dëshmitarë dhe të dëmtuar në veprën penale për të cilën dyshohet, njofton gazeta Danas.
Prokuroria kishte propozuar një ditë më parë që Matoviqit t’i caktohej paraburgimi deri në 30 ditë, me arsyetimin se në liri ai mund të ndikonte te dëshmitarët, por gjykata nuk e pranoi këtë propozim dhe zgjodhi masën më të butë të ndalimit të kontaktit me dëshmitarët dhe të dëmtuarit.
Siç njofton Danas, Matoviqi u arrestua më 18 nëntor, nën dyshimin se ka kryer veprën penale të rrezikimit të sigurisë në ditën e zgjedhjeve. Sipas Prokurorisë Themelore në Novi Sad, ai dyshohet se më 25 tetor, në ditën e zgjedhjeve të parakohshme parlamentare, në lagjen Novo Naselje të Novi Sadit, bashkë me një person tjetër, u ka drejtuar disa personave kërcënime serioze për jetën.
Matoviqi është një nga 49 personat që Aleksandar Vuçiqi i fali ditën e fundit të mandatit të tij si president. Sipas Danas, ai u fal për veprën penale të sjelljes së dhunshme në një tubim publik, kur në shkurt të këtij viti, para Teatrit Kombëtar Serb në Novi Sad, bashkë me një grup mbështetësish të SNS-së, goditi një student dhe shtyu një vajzë, e cila më pas përplasi kokën pas murit.
Për rastin e ri, prokuroria e Novi Sadit e kishte shpallur Matoviqin në kërkim që më 5 nëntor, pasi për të njëjtën ngjarje të ditës së zgjedhjeve ishte arrestuar personi tjetër i dyshuar, ndërsa Matoviqi u ndalua më 18 nëntor dhe u mor në pyetje të nesërmen.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.