Gjyli: Protesta po formatohet si një lëvizje politike

Pedagogia Arsela Gjyli ka deklaruar në emisionin “3D” të Alban Dudushit në RTSH1 se protesta që zhvillohet në kryeqytet ndaj ndërtimeve në Zvërnec po formatohet si një lëvizje politike.

“Protesta e pati nga arsyet mjedisore. E pati nga dhuna e ushtruar në Zvërnec. Ajo ishte shkrepësja që nxiti protestën. Por unë e shikoj të ndarë protestën e Tiranës nga çështja e Zvërnecit.

Në optikën time protesta e Tiranës në strukturën e saj, në qasjen e saj, në direktivat dhe në mënyrën se si janë artikuluar kërkesat që nga dita në ditë ka ndryshuar qasja për protestën mendoj që protesta ka marrë një nuancë dhe një ngjyrim politik”, u shpreh Gjyli.

Ajo theksoi se protesta duhet të ketë një dirigjent nisur nga ajo që ka ndodhur përgjatë këtyre ditëve.

“Unë nuk mendoj se kjo protestë nuk ka dirigjent, në mënyrë absolute. Ta shikojmë në plan studimor, në planin e shkencave politike, të analizës politike, unë mendoj se ka interesa, ka ndikime, ka mënyra etj.

Në optikën time u nis me Zvërnecin me pretendimet për Zvërnecin, pastaj u ngrit çështja e pronës dhe siç ishte kërkesa për shfuqizimin e disa ligjeve shumë të rëndësishme që qeveria ka menduar si strategji për zhvillimin e vendit”, tha më tej Gjyli.