Gjyqi i Metës, avokati Cakrani: Antikushtetuese mostrasmetimi i seancës live

Avokati i ish-presidentit Ilir Meta, Kujtim Cakrani, në një komunikim për mediat pas shtyrjes së seancës në Gjykatën e Posaçme, ka deklaruar se mos

Avokati i ish-presidentit Ilir Meta, Kujtim Cakrani, në një komunikim për mediat pas shtyrjes së seancës në Gjykatën e Posaçme, ka deklaruar se mos transmetimi live i seancës gjyqësore është një veprim antikushtetues.

Sakaq, Cakrani mori shembullin e gjyqit në Hagë dhe të rastit të fundit në Kosovë për çështjen e vrasjes së Liridona Ademajt, ku vendimi dhe e gjithë çështja gjyqësore u bënë live dhe avokatët ishin në krah të të dënuarve, gjë që sipas Cakranit nuk u zbatua në gjyqin e Metës.

“Të gjitha gjyqet bëhen me kamera dhe online që t’i shikojnë qytetarët dhe unë ndaj kërkoj që gjykata të ngrihet në lartësinë që kërkon ligji dhe Konventa dhe të vendosi presidentin në kushte të barabarta dhe përballë shqiptarëve dhe të provojë pafajësinë e tij.

Dhe kur bëhen gjyqet në Hagë, imagjino tani mos të bëhet gjyqi i presidentit.

Fakti që kjo gjykatë nuk merr vendim që ta shfaqë gjyqin online, kjo do të thotë që ka frikë nga prova, nga e vërteta dhe ata nuk e kanë guximin t’u tregojnë shqiptarëve se çfarë montimi i ka bërë gjykata çështjes Meta.

Nuk e kuptoj dot gjykatën që merr vendim antikushtetues dhe thotë që nuk do ta shfaqim publikisht këtë seancë gjyqësore.

Kur i pandehuri vetë shfaq dëshirën dhe ajo nuk e pranon këtë, nuk e kuptoj.

Kjo pyetje duhet t’u bëhet ndërkombëtarëve që të tregojnë se sa e mirë është drejtësia shqiptare. Edhe ata ndërkombëtarët unë do t’i ftoj që të vijnë dhe të shikojnë presidentin e republikës të mbyllur në kafaz, është e papranueshme.

Është e papranueshme që sot në vitin 2026 të mbahet i mbyllur në kafaz presidenti i republikës, kryetari i bashkisë dhe çdo funksionar tjetër, sepse aty humbet nuanca e të qenit një shtet i drejtë dhe bëhesh një shtet diskriminues.

E patë në Kosovë javën e shkuar, përfundoi një burgim i përjetshëm dhe ai individi u gjykua në krah të avokatëve të tij dhe live”, u shpreh Cakrani.