Gonxhja: Objektet e “Dhomës së Mullirit” në Ardenicë, tashmë në inventarin e trashëgimisë kulturore

Në Ditën Kombëtare të Trashëgimisë Kulturore, ministri i Turizmit, Kulturës dhe Sportit, Blendi Gonxhja, bëri të ditur se, Instituti Kombëtar i Trashëgimisë Kulturore ka regjistruar dhe kataloguar për herë të parë objektet e ruajtura në “Dhomën e Mullirit”, të Manastirit të Ardenicës.

Tashmë këto objekte do të jenë pjesë e fondit të inventarit të trashëgimisë kulturore. Bëhet fjalë për kapitale, stele, gurë miliare dhe dëshmi të tjera nga periudha e territore të ndryshme, të cilat mbartin fragmente të historisë sonë. Specialistët e IKTK, përmes dokumentimit dhe studimit, vijojnë punën për t’i njohur, mbrojtur dhe përcjellë këto pasuri te brezat e ardhshëm.

Manastiri i Ardenicës ndodhet në qendër të një vargu kodrinor që ndan fushën e Myzeqesë.

Gonxhja përcolli pamje nga një sërë objektesh antike të datueshme në periudha të ndryshme dhe që vijnë nga zona të ndryshme përreth manastirit, siç janë sitet arkeologjike të Apolonisë, Kolkondasit etj. Disa prej këtyre objekteve antike mund t’i përkasin edhe shekullit II para Krishtit.