Gruaja e ish-oficerit shqiptar, kërkon mbrojtje nga kryeministri italian

“Ne jemi të dënuar me vdekje, Italia duhet të na mbrojë”. Kështu është shprehur bashkëshortja e Fadil Memës, ish-oficerit shqiptar, të vrarë në Torino të Italisë, para pak ditësh.

E përditshmja italiane “La stampa”, e cila po e ndjek vazhdimisht këtë çështje shkruante dje se gruaja e 54-vjeçarit ishte shprehur se “përgjegjësit e vrasjes njihen prej 10 vitesh. Dora më dridhej sonte. Besoj se më kuptoni”.

Gazetarja italiane e vijon përshkrimin me fjalët, “Shtrëngon letrën e bardhë dhe has në vështrimin e fëmijëve. Merr frymë dhe thotë: Kjo është një letër nga një nënë dhe vejushë e mbërthyer nga dhimbja dhe do t’ia dërgoj Mateo Renzit dhe Sergio Matarelës. Do t’iu them se në mes të këtij horrori që po më shkatërron, gjeta kurajën dhe forcën për t’ju kërkuar ndihmë dhe mbrojtje për mua dhe 3 fëmijët e mi. Nëse kjo nuk ndodh, ata do të m’i vrasin, një nga një. Mafia shqiptare nuk njeh kufij, as ndaj nesh që jemi një familje intelektuale”.

Dy ditë më parë, Elton Mema, djali i ish-oficerit tha se vrasja e të atit u porosit nga familja Çapja në Elbasan, por nuk njihte vrasësit. Ai foli për “Repubblica”, për një histori vrasjesh, të nisura pas ekzekutimit të biznesmenit nga Elbasani, Sokol Çapja, në vitin 2005.