Hagel: Donacioni i Shqipërisë në mbështetje të Irakut, kontribut për zbutjen e krizës
Sekretari i Mbrojtjes i SHBA-së, Chuck Hagel, i ka dërguar një letër falenderimi ministres së Mbrojtjes, Mimi Kodheli, për ndihmën që Shqipëria ka dhënë në mbështetje të përpjekjeve të koalicionit, në luftën kundër Shtetit Islamik në Siri dhe Irak.
Në mesazhin e tij, Sekretari Hagel thekson se, “donacioni bujar i Shqipërisë në mbështetje të Qeverisë së Irakut dhe specifikisht për forcat kurde Peshmerga, ka kontribuar në zbutjen e krizës aktuale”.
“Vendimi i shpejtë i Shqipërisë, e vendosi vendin tuaj në krye të mbështetjeve ndërkombëtare për të luftuar Shtetin Islamik në Siri dhe Irak. Kontributi juaj mjaft domethënës, ka qenë në qendër të përpjekjeve për të furnizuar Peshmergat kurde, në këto kohë kritike”, shkruan Hagel në mesazhin e tij.
Duke marrë në konsideratë rëndesën e këtij konflikti, vijon Hagel, “unë ju falenderoj për konsideratat tuaja për kontribute shtesë, mbështetur në propozimin gjatë Samitit të NATO-s në Wells. Vazhdimësia e mbështetjes së Peshmergave do të jetë vendimtare në suksesin e vazhdueshëm të koalicionit”.
Në fund të letrës së tij, Sekretari Hagel shpreh gatishmërinë e Shteteve të Bashkuara të Amerikës për të vazhduar bashkëpunimin strategjik me Shqipërinë dhe për të forcuar bashkëpunimin në fushën e mbrojtjes
