Halimi: Për “mbetjet” të vendosë sovrani

Kuvendi i Shqipërisë ka nisur punimet këtë të enjte me një debat mbi ligjin për importin e mbetjeve, të miratuar muajin e kaluar në Parlament.

Deputeti Eduard Halimi, duke folur në emër të Partisë Demokratike, ka kërkuar që kjo “çështje madhore” të vendoset nga sovrani.

“Çështja është e një rëndësie të madhe dhe jetike për njerëzit. Qytetarët duhet të shohin sot nëse kjo ngrehinë është simbol i demokracisë. Ne depozituam kërkesën për referendum, por Konferenca e Kryetarëve nuk arriti të merrte një vendim sot”, ka thënë Halimi.

Ai ka akuzuar kryeministrin Rama se, “gënjeu kur tha se nuk kishte dijeni për ligjin sepse atë e sollën disa deputetë”. Gjithashtu, ka vijuar Halimi, kreu i qeverisë mashtron kur thotë se nuk bëri sa duhet për të informuar qytetarët.