Haradinaj e quan Kurtin “keqbërës patologjik”: Po punon për ta zhbërë Kosovën

Kryeministri Albin Kurti po e çon vendin drejt zgjedhjeve dhe po punon për ta zhbërë Kosovën, ka akuzuar sot ish-kryetari i Aleancës, Ramush Haradinaj, siç njofton KosovaPress.

Duke folur për media, Haradinaj ka thënë se kanë mbetur më pak se shtatë orë për votimin në lexim të dytë të Ligjit për Dhomat e Specializuara, dhe se mosmiratimi i tij përbën goditje për UÇK-në dhe Kosovën.

Sipas tij, Ligji për Dhomat e Specializuara nuk i përket një partie politike, por u votua në lexim të parë nga 91 deputetë të Kuvendit të Kosovës, raporton KosovaPress.

“Kosova është më e madhe se keqbërësi patologjik”, tha Haradinaj, duke e akuzuar Kurtin për veprime të dëmshme ndaj vendit. Ai po ashtu deklaroi se Kurti që nga 8 korriku ka zvarritur procesin për të shfrytëzuar afatet kushtetuese.