“Historitë e suksesit shqiptaro-amerikan”, Rama takon kongresmenët

Marrëdhëniet mes Shqipërisë dhe Shteteve të Bashkuara kanë një urë të fortë lidhëse, komunitetin shqiptaro-amerikan. Me senatorët, kongresmenët dhe përfaqësuesit e këtij komuniteti ndanë me kryeministrin Rama historitë e suksesit shqiptaro-amerikan.

“Të gjithë shqiptarët në Amerikë janë ambasadorë të vendit të tyre dhe e bëjnë Amerikën të madhe, sepse nuk e harrojnë Shqipërinë dhe nuk duhet ta harrojnë”, deklaroi kongresmeni Charles Rangel.

“Ishte shumë befasuese për mua kur udhëtova në Shqipëri, Nuk do të gjeni asnjë vend tjetër në botë që ka aq shumë shtëpi, ku flamuri shqiptar valëvitet përkrah flamurit amerikan. Është një miqësi e veçantë, një miqësi që e çmojmë shumë këtu në SHBA”, tha nga ana tjetër senatori Mark Kirk.

Për kryeministrin Rama, shqiptarët kanë një sfidë të re për të krijuar një histori të re suskesi.

“Le të frymëzohemi nga historitë e suksesit, nga më të mirat tona, për të bërë të mundur që Shqipëria dhe Kosova të jenë një histori suksesi në Ballkan dhe që Ballkani të jetë një histori suksesi në Europë. Europa ka shumë nevojë për një histori suksesi dhe kush tjetër, përveç Ballkanit Perëndimor mund të japë një histori suksesi. Ne jemi e vetmja histori suksesi që mund të shkruajë tani Europa. Le ta bëjmë realitet”, deklaroi Rama.