Houthit paralajmërojnë kompanitë ajrore të shmangin aeroportet saudite

– Të paktën 12 persona kanë humbur jetën dhe 309 të tjerë janë plagosur nga një sulm ndaj aeroportit ndërkombëtar “King Khalid” në Riad, kryeqytetin e Arabisë Saudite, sipas autoriteteve saudite të aviacionit civil.

Viktimat përfshijnë katër shtetas sauditë, dy shtetas nga Bangladeshi dhe nga një shtetas të Shteteve të Bashkuara të Amerikës, Egjiptit, Jordanisë, Palestinës, Sirisë dhe Sudanit. Disa nga të plagosurit ndodhen në gjendje kritike dhe po marrin trajtim mjekësor në spitale.

Pas sulmit, autoritetet pezulluan përkohësisht operacionet në aeroport, ndërsa ekipet përkatëse po vlerësojnë dëmet materiale dhe sigurinë e infrastrukturës.

Koalicioni ushtarak i udhëhequr nga Arabia Saudite, i cili mbështet forcat qeveritare në Jemen, fajësoi rebelët Houthi për sulmin dhe paralajmëroi një përgjigje. Grupi Houthi nuk ka marrë ende përgjegjësinë për sulmin e së shtunës, por më herët kishte pretenduar se kishte kryer goditje të tjera ndaj të njëjtit aeroport, të enjten, ku mbetën të vrarë tre persona dhe u dëmtua një avion.

Sulmet vijnë në një kohë të përshkallëzimit të konfliktit mes rebelëve Houthi, të mbështetur nga Irani, dhe forcave qeveritare jemenase, të cilat mbështeten nga Arabia Saudite.

Sulmi i së shtunës konsiderohet më vdekjeprurësi në Arabinë Saudite që nga maji i vitit 2015. Përveç goditjes ndaj aeroportit të Riadit, një tjetër predhë ra pranë aeroportit ndërkombëtar “King Fahd”, në qytetin Dammam, në lindje të vendit.

Presidenti amerikan Donald Trump deklaroi se Uashingtoni po shqyrton mundësinë e përfshirjes në sulmet kundër rebelëve Houthi, pas zhvillimeve të fundit.