Ibrahimoviq: Refuzimi i kërkesave joracionale të Kroacisë nuk është refuzim i rrugës evropiane

Ministri i Punëve të Jashtme Ervin Ibrahimoviq, duke iu përgjigjur pyetjeve të deputetëve në Kuvend, tha se qasja e Malit të Zi në bisedimet me Kroacinë nuk është pranim apo refuzim automatik i të gjitha kërkesave, por shqyrtim i përgjegjshëm i secilës çështje veç e veç, siç njofton Vijesti.

Deputeti i SNP-së Bogdan Bozhoviq e pyeti nëse Mali i Zi duhet të ketë një vijë të kuqe në bisedimet me Kroacinë dhe nëse janë të pranueshme të tetë kushtet e parashtruara nga Kroacia, sipas raportimit të RTCG-së. Ibrahimoviq u përgjigj se vijat e kuqe janë mbrojtja e interesave kombëtare të Malit të Zi, se nuk pranohen ultimatume apo zgjidhje të imponuara paraprakisht dhe se Mali i Zi duhet të thotë qartë “jo” kërkesave që nuk janë në përputhje me të drejtën ndërkombëtare dhe që cenojnë interesat e tij. Ai theksoi se kjo nuk është një “jo” për Bashkimin Evropian, por një “po” për të drejtën ndërkombëtare dhe për marrëdhëniet e fqinjësisë së mirë.

Sipas Ibrahimoviqit, marrëdhëniet me Kroacinë kanë një rëndësi të veçantë, sepse bëhet fjalë për një shtet fqinj dhe mik, anëtar të Bashkimit Evropian dhe të NATO-s, ndërsa Mali i Zi synon të jetë anëtari i ardhshëm i Bashkimit Evropian. Ai tha se marrëdhëniet janë në një nivel të kënaqshëm, se çështjet e hapura ekzistojnë prej më shumë se tri dekadash dhe nuk mund të zgjidhen në një kohë të shkurtër, se ato nuk duhet të jenë garë e politikës ditore dhe se për çdo problem duhet të gjendet një zgjidhje e drejtë për të dyja palët.

Deputeti i DPS-së Andrija Nikoliq e pyeti për detyrimet konkrete, afatet dhe lëshimet lidhur me anijen “Jadran”, Prevllakën dhe dëmshpërblimin e ish-të burgosurve të kampit të Morinjës. Ibrahimoviq u përgjigj se Mali i Zi nuk ka marrë detyrime të reja, nuk ka pranuar afate dhe nuk ka bërë lëshime në dëm të interesave të tij për asnjë prej këtyre tri çështjeve, duke shtuar se do të mbrojë çdo cent të shtetit.