ILDKP, masa administrative për gjashtë zyrtarë
Inspektorati i Lartë i Deklarimit dhe Kontrollit të Pasurive dhe Konfliktit të Interesave vijon punën për rakordimin e dorëzimit në afat të dokumentit zyrtar “Deklaratë e Interesave Private”. Gjatë këtyre ditëve ai ka konstatuar 6 zyrtarë të niveleve të ndryshme, të cilët janë në shkelje të afateve të dorëzimit të deklaratës së interesave private.
ILDKP sqaron se zyrtarët që u ndëshkuan me masa administrative janë të niveleve të ndyshme si: Shtjefën Lleshi, ish – Kryetar i Gjykatës së Rrethit Gjyqësor Pukë, Gëzim Ukperaj, ish – Inspektor në Drejtorinë Rajonale Tatimore Kukës, Bernard Capa, ish – Inspektor në Drejtorinë Rajonale Tatimore Dibër, Grespin Lilaj, ish – Inspektor në Drejtorinë Rajonale Tatimore Durrës, Albano Çepele, ish – Gjyqtar pranë Gjykatës së Rrethit Gjyqësor Shkodër, Taulant Kurti, ish – Inspektor Hetimi pranë Drejtorisë së Përgjithshme të Tatimeve.
ILDKP shpjegon se “në zbatim të nenit 40, pika 1 të ligjit nr.9049, datë 10.04.2003 “Për deklarimin dhe kontrollin e pasurive, të detyrimeve financiare të të zgjedhurve dhe të disa nëpunësve publikë”, i ndryshuar, sipas të cilit: “Për mosdeklarim periodik apo me kërkesë, në afat dhe pa shkaqe të arsyeshme, zyrtari ose personi i lidhur me të, që mbart detyrim për deklarim, dënohet me gjobë nga 50.000 (pesëdhjetë mijë) lekë deri në 100.000 (njëqind mijë) lekë”. Inspektori i Përgjithshëm, përmes vendimeve të posaçme, vendosi masën administrative “Gjobë” për subjektet deklarues që rezultuan të mos kenë dorëzuar deklaratën e interesave private.
“Në lidhje me masën administrative të zbatuar ndaj secilit subjekt, Inspektorati i Lartë ka njoftuar zyrtarin, subjekt deklarimi, si dhe institucionin epror”, thuhet ne deklaratë e ILDKP.
