Ilir Meta del nga paraburgimi, shkon në Skrapar për ceremoninë mortore të të atit

Prej orës 07:00 të mëngjesit të kësaj të marte, ish-presidenti i Shqipërisë Ilir Meta ka lënë qelinë e paraburgimit dhe është nisur drejt Cepanit të Skraparit për të marrë pjesë në ceremoninë mortore të babait të tij, Rexhep Meta, i cili ndërroi jetë të hënën në moshën 83-vjeçare.

Ceremonia e varrimit është planifikuar të zhvillohet në orën 12:00 ndërsa leja e dhënë për Metën parashikon që ai të mund të qëndrojë edhe në drekën që do të shtrohet pas ceremonisë mortore.

Sipas burimeve, ish-presidenti pritet të kthehet në paraburgim në orët e pasdites, ndërsa është parashikuar që ai të dalë sërish të nesërmen në mëngjes, nga ora 09:00 deri në 21:00, me miratim të Prokurorisë së Posaçme (SPAK), për të marrë pjesë edhe në pritjet e ngushëllimeve që familja do të organizojë në Tiranë.