Imzot Rrok Mirdita, figura e shquar e klerit katolik shqiptar që i kushtoi jetën komunitetit

Më 28 shtator të vitit 1939, në Klleznë të Ulqinit, lindi Imzot Rrok Mirdita, personalitet i shquar i klerit katolik shqiptar.

Shkollën e mesme e kreu në vendlindje, ndërsa studimet e larta në teologji dhe filozofi i ndoqi në Zadar dhe Zagreb të Kroacisë.

Më 5 korrik 1965 u shugurua meshtar dhe për disa vite shërbeu pranë besimtarëve vendas. Më pas u dërgua në Nju-Jork, për t’i shërbyer bashkësisë katolike shqiptare në Bronx.

Gjatë viteve të shërbimit në Shtetet e Bashkuara, Imzot Rrok Mirdita dha një kontribut të veçantë në forcimin e jetës fetare dhe komunitare të shqiptarëve. Në vitin 1985 themeloi radioprogramin Zëri i Kishës Katolike “Zoja e Shkodrës”, ndërsa u angazhua edhe në themelimin dhe zhvillimin e famullive “Zoja e Shkodrës” dhe “Zoja e Këshillit të Mirë”, në Nju-Jork, SHBA.

Më 24 prill 1993 Imzot Rrok Mirdita u shugurua nga Papa Gjon Pali II si Arqipeshkëv i Durrësit dhe Tiranës dhe u kthye në Shqipëri, ku mori përsipër detyrën e ringritjes së Kishës Katolike pas dekadash diktature dhe ateizmi shtetëror.

Në krye të Kishës Katolike dhe si drejtues i Karitasit Shqiptar, Imzot Rrok Mirdita u angazhua në ndihmën humanitare, në mbështetjen e arsimit, në përkujdesjen ndaj shtresave në nevojë dhe në forcimin e harmonisë e të bashkëjetesës ndërfetare.

U nda nga jeta në Tiranë më 7 dhjetor të vitit 2015.