Instagram ndryshon fytyrë

Është një ndër rrjetet sociale më të frekuentuar dhe më të parapëlqyer, sidomos për amatorët dhe profesionistët e fotografisë.

Dhe pesë vite nga dalja në treg, Instagram ka vendosur të bëjë ndryshimin e parë në ikonën e vet.

Ikona e re u përshtatet zhvillimeve të hovshme në fushën e teknologjisë duke sjellë më shumë ngjyra që e shkrijnë më mirë me entuziazmin e sistemeve iOS dhe Android, që të dy të orientuar tek më shumë ngjyra.

Kompania e blerë nga Mark Zuckerberg për 1 miliardë dollarë në vitin 2012, ka hequr dorë nga ikona tradicionale me objektivin e kameras, duke u shndërruar në një ikonë më e thjeshtë dhe e ‘ylberizuar’.