INUK vazhdon prishjen e ndërtimeve pa leje

Inspektoriati Ndërtimor Urbanistik Kombëtar (INUK) vijon sot në Tiranë aksionin për lirimin e hapësirave publike, me prishjen e ndërtimeve pa leje përgjatë rrugës së Elbasanit. Paralelisht, ky aksion do të zhvillohet dhe në lagjen Brakë dhe Laprakë. Prej disa javësh INUK-u ka vijuar intensivisht aksionet për prishjen e objekteve të paligjshme në shumë qytete të vendit.
Një ditë më parë, kryeministri Edi Rama tha se aksioni i INUK për prishjen e ndërtimeve pa leje “do të shtrihet në të gjithë territorin dhe hap pas hapi, për të bërë shkuljen e të gjithë çibanëve që kanë mbirë në rrugë dhe trotuare mes lagjeve dhe hyrjeve të pallatave dhe që i kanë nxirë jetën për vite të tëra qytetarëve të urtë dhe familjeve të këtij vendi”.