Irak, ushtria përgatitet për “goditjen fatale” ndaj ISIS në Falluxha

Ushtria irakene ka nisur atë që konsiderohet si faza e fundit e operacionit për të rimarrë qytetin e Falluxhas, një prej bastioneve të të ashtuquajturit Shtet Islamik. Ofensiva e fundit vjen vetëm një javë pasi qeveria nisi përpjekjet për shtënë nën kontroll qytetin e mbajtur prej xhihadistëve që prej vitit 2014.

Në Falluxha përllogariten të jenë bllokuar rreth 50 mijë civilë, teksa vetëm pak qindra vetë apo familje kanë mundur të zhvendosen prej andej. Sipas Kombeve të Bashkuara, ka raportime që flasin për njerëz që po vdesin nga uria atje, apo edhe raste të tilla të vrasjes së tyre vetëm se kanë refuzuar të luftojnë përkrah ISIS-it.

Forcat ushtarake, përfshi edhe anëtarë të një njësie të specializuar antiterrorizmi, po përpiqen të hyjnë në qytet nga disa fronte njëherësh, thuhet në deklaratën zyrtare të ushtrisë irakene. Por, ata janë duke hasur pengesa, të formave vetëvrasje kamikaze apo me autobomba, të cilat përdoren gjatë rezistencës së tyre nga luftëtarët xhihadistë.

Udhëheqës ushtarakë, ndërkohë, kanë bërë të ditur se me të gjitha gjasat do të ketë një ndërprerje të luftimeve përpara se të nisë mësymja e qendrës së qytetit, në mënyrë që të lejojnë sa më shumë civilë të munden të largohen prej andej.

Falluxha ra nën kontrollin e ISIS-it në janar të vitit 2014, në atë që përbënte atë një moment kyç në rritjen e Shtetit Islamik, kohë kur edhe deklaruan kalifatin në territoret e pushtuara në Irak dhe Siri. Së bashku me Mosulin, përbëjnë dy prej qyteteve më të mëdha të gjendura nën kontrollin e ISIS aktualisht.