Ish-kreu i Rrugëve Andi Toma nën hetim për pagesat

Ish-drejtorit të përgjithshëm të Autoritetit Rrugor, Andi Toma i hapen sërish telashe me drejtësinë, gati pesë vjet pasi ai u kthye në një person nën hetim së bashku me ish-ministrin Lulzim Basha për dosjen “Durrës-Kukës”.
Këtë radhë ish-drejtori i përgjithshëm i Rrugëve shihet me dyshim nga organi i akuzës pas një raporti auditues të Kontrollit të Lartë të Shtetit, në të cilin ai kallëzohet për shpërdorim detyre dhe tejkalim kompetencash për pagesat e firmosura për ndërtimin e unazës së re në kryeqytet.
Burime jozyrtare thanë për Top Channel se kjo dosje po hetohet nga njësia task forcë e Prokurorisë së Tiranës. Jozyrtarisht thuhet se në dokumentacionin e depozituar nga KLSH rezulton se Andi Toma, pas tenderimit të këtij aksi dhe paraqitjes së projekteve nga disa firma, por edhe të bilancit të tyre, rezulton se firma e Tomës ka siguruar parapagimin e tyre në miliona lekë, në një kohë kur ende nuk kishin nisur investimet.
Këto parapagesa u përkasin datave 19 qershor dhe 20 qershor 2013, kur ish-drejtori Toma u ka kaluar firmave ndërtuese nga 26.100.000 lekë për secilën nga këto data, në një kohë që evidentohet se kjo nuk ishte kompetencë e ish-drejtorit, por e ministrit të Financave.
Në të njëjtin muaj ish-drejtori Toma ka urdhëruar me firmë edhe paradhënien për 25 milionë në datën 3 qershor e pak ditë më pas edhe të 25 milionëve të tjera. Sipas prokurorisë, e njëjta, procedure është kryer edhe në rrugen e Beratit, Loti 2, ku në dy raste rezulton sipas raportit të KLSH se janë kaluar shumat prej 30.100.000 dhe 7.500.000 lekë.
Në prokurori ndodhen nën hetim edhe dy zyrtarë të tjerë të Autoritetit Rrugor shqiptar, konkretisht ish-nëndrejtori i përgjithshem Skënder Cota dhe ish-drejtori i Drejtorisë Teknike, Lefter Kostenja, të cilët sipas një raporti tjetër të KLSH, në projektin 2012-2013 për veprat e artit përgjatë autostradës Kukës-Morinë-Loti 1 kanë pranuar investime me dy standarde.