Ish-ministri i Shëndetësisë Ilir Beqaj vijon betejën ligjore për lirinë

Ish-ministri i Shëndetësisë, Ilir Beqaj, nuk ka hequr dorë nga kërkesat për të ndryshuar masën e sigurisë, me synim lirimin nga qelia ku ndodhet prej korrikut të vitit 2024.

Pasi shkalla e parë e gjyqësorit rrëzoi kërkesën e tij për zëvendësimin e masës “arrest në burg” me një masë më të butë, përfshirë edhe garancinë pasurore, Beqaj i është drejtuar Apelit të Posaçëm me një ankim ndaj vendimit.

Edhe në shkallën e dytë të gjyqësorit, kërkesa e tij mbetet e njëjtë: lirimi nga paraburgimi.

Ilir Beqaj akuzohet për pesë vepra penale në kuadër të një procedimi që lidhet me dyshimet për abuzim me fondet e Bashkimit Europian përmes programit “SASPAC”.

Prokuroria ka renditur ndaj tij akuzat për “korrupsion pasiv”, “shkelje të barazisë në tendera”, “falsifikim dokumentesh”, “mashtrim në bashkëpunim” dhe “mosdeklarim pasurie”.

Paralelisht me këtë çështje, ish-ministri po gjykohet edhe në dosjen e njohur si “Sterilizimi”, një proces i ndarë nga ai i grupit tjetër të dënuar disa javë më parë nga Gjykata e Posaçme.