IZRAEL – Eisenkot, 28 ditë kohë për të formuar qeverinë

– Presidenti i Izraelit, Isaac Herzog, ka vendosur t’i japë ish-shefit të ushtrisë dhe liderit të partisë “Yashar”, Gadi Eisenkot, mandatin për formimin e qeverisë së re, duke i dhënë 28 ditë kohë për të siguruar mbështetjen e nevojshme parlamentare, sipas “Reuters”.

Vendimi vjen pas zgjedhjeve parlamentare të 27 tetorit, të cilat nuk rezultuan me një shumicë të qartë në Knesset, parlamentin izraelit, duke lënë të hapur mundësinë e ndryshimit të pushtetit dhe përfundimit të qeverisjes së gjatë të kryeministrit Benjamin Netanyahu.

Zyra e presidentit njoftoi se Herzog informoi dje Eisenkot për vendimin e tij, ndërsa ceremonia zyrtare e dorëzimit të mandatit është parashikuar të zhvillohet të sot, më 8 nëntor, në orën 17:00 sipas orës lokale.

Gjatë konsultimeve me përfaqësuesit e partive parlamentare, 67 deputetë rekomanduan që mandati për formimin e qeverisë t’i jepej Eisenkot, ndërsa 46 deputetë mbështetën Netanyahun.

Shtatë deputetët e një partie tjetër nuk rekomanduan asnjë kandidat.

Sipas rezultateve të zgjedhjeve, blloku i Netanyahut siguroi 53 vende në parlamentin me 120 anëtarë, ndërsa partitë e opozitës të drejtuara nga Eisenkot morën 48 vende.

Dy partitë arabe siguruan gjithsej 19 vende, duke e çuar në 67 numrin e deputetëve që mbështetën Eisenkotin gjatë konsultimeve.

Për të formuar qeverinë, Eisenkot duhet të sigurojë mbështetjen e të paktën 61 deputetëve.

Megjithatë, rruga drejt krijimit të një koalicioni paraqitet e ndërlikuar, pasi disa prej partive që e mbështesin kundërshtojnë përfshirjen e partive arabe në qeveri.

Një tjetër mundësi është krijimi i një qeverie të pakicës, e cila do të mbështetej nga jashtë nga deputetë të partive të tjera.

Megjithatë, edhe kjo alternativë përballet me kundërshti politike.

Partitë ultraortodokse paraqesin gjithashtu një tjetër sfidë për negociatat, për shkak të mosmarrëveshjeve lidhur me përjashtimet nga shërbimi ushtarak për pjesëtarët e komunitetit të tyre.

Eisenkot, ish-shef i Shtabit të Përgjithshëm të Forcave të Mbrojtjes së Izraelit, ka deklaruar se do të bëjë gjithçka për të formuar një qeveri të re.

Ai ka përjashtuar mundësinë e bashkëpunimit me Netanyahun, ndërsa ka kritikuar politikat e qeverisë së tij, veçanërisht për mënyrën e drejtimit të luftës në Gazë dhe qëndrimin ndaj dhunës së kolonëve në Bregun Perëndimor.

Nga ana tjetër, Netanyahu ka bërë thirrje për krijimin e një qeverie të unitetit kombëtar, duke kërkuar bashkimin e forcave politike përballë sfidave të sigurisë me të cilat përballet vendi.

Sipas legjislacionit izraelit, kandidati i ngarkuar për formimin e qeverisë ka 28 ditë kohë për të përfunduar negociatat.

Presidenti mund t’i japë atij edhe një afat shtesë deri në 14 ditë, nëse është e nevojshme.

Nëse Eisenkot nuk arrin të formojë qeverinë brenda këtij afati, presidenti mund t’ia kalojë mandatin një kandidati tjetër.

Në rast se edhe përpjekjet e mëtejshme dështojnë, vendi mund të shkojë në zgjedhje të parakohshme.

Ndërkohë, qeveria e Netanyahut do të vazhdojë të ushtrojë funksionet e saj në detyrë deri në krijimin e një qeverie të re.

Benjamin Netanyahu ka qenë një nga kryeministrat më jetëgjatë të Izraelit.

Ai ka drejtuar vendin fillimisht nga viti 1996 deri në vitin 1999, më pas nga viti 2009 deri në vitin 2021 dhe është rikthyer në pushtet në dhjetor 2022. /