Ish-presidenti amerikan padit në gjykatë rrjetin mediatik CNN duke e akuzuar atë për shpifje

Ai pretendon se rrjeti mediatik ka kryer një fushatë të ashpër sulmesh. Në padinë e paraqitur në Gjykatën e Floridas, Trump thotë se CNN ka përdorur ndikim të konsiderueshëm si një rrjet kryesor lajmesh për ta mposhtur atë politikisht.

CNN nuk pranoi të komentojë këtë lëvizje. Në padinë prej 29 faqesh thuhet gjithashtu se CNN kishte një histori të gjatë kritikash, por shtoi sulmet në muajt e fundit, sepse rrjeti kishte frikë se ai do të kandidonte përsëri për president në vitin 2024.

“Si pjesë e përpjekjes së bashkërenduar për të anuar ekuilibrin politik në të majtë, CNN është përpjekur të njollosë ish presidentin me një sërë etiketimesh gjithnjë e më skandaloze, të rreme duke e përshkruar Trump si “racist”, “prorus”, “kryengrites” dhe në fund si ‘Hitler’”, shkruhet në padi.

Në dokumente listohen disa raste në të cilat CNN e krahason Trumpin me Hitlerin, duke përfshirë një raport special të janarit 2022 nga analisti Fareed Zakaria që shfaqte pamjet e diktatorit gjerman.

Ish-presidenti paralajmëroi se do të ngrejë padi edhe kundër kompanive të tjera të mëdha mediatike “në javët dhe muajt e ardhshëm” dhe se ai madje mund të ndërmarrë veprime kundër komitetit të Kongresit që po heton sulmin e 6 janarit 2021 në Kapitol.