Ishin kthyer në tmerrin e vjedhjes së makinave në Vlorë dhe Orikum, arrestohen 2 autorët e dyshuar!

Dy persona janë arrestuar në Vlorë pas dy operacioneve policore të zhvilluara gjatë 24 orëve të fundit për zbardhjen e rasteve të vjedhjes dhe tentativës për vjedhjen e automjeteve.

Njëri prej tyre, 63 vjeç, u kap në flagrancë duke tentuar të vidhte një automjet tip “Citroen” në lagjen “Pavarësia”, ndërsa personi tjetër dyshohet se ka vjedhur një “Benz” në Bishan dhe më pas ka tentuar të vjedhë një “Jeep” në Orikum.

Policia vijon hetimet për të zbardhur raste të tjera të mundshme të vjedhjeve që mund të jenë kryer nga dy të arrestuarit.

Njoftimi i Policisë:

“Finalizohen në 24 orët e fundit, dy operacione policore për zbardhjen e vjedhjeve të automjeteve.

Arrestohen në flagrancë 2 autorët e dyshuar.

Si rezultat i punës intensive hetimore për zbardhjen e rasteve të vjedhjeve, specialistët për Hetimin e Krimeve të Komisariatit të Policisë Vlorë kanë finalizuar 2 operacione për zbardhjen e 3 rasteve të vjedhjes/tentativës së vjedhjes së automjeteve. Në përfundim të veprimeve procedurale, u arrestuan shtetasit:

-M. D., 63 vjeç, pasi u kap nga shërbimet e Policisë, duke vjedhur një automjet tip “Citroen”, në lagjen “Pavarësia”, Vlorë. Automjeti u gjet dhe u sekuestrua;

-D. L., 40 vjeç, pasi dyshohet se ka vjedhur në fshatin Bishan, 1 automjet tip “Benz”, të cilin e ka braktisur më pas në qytetin e Orikumit.

Gjithashtu, disa orë më vonë, në qytetin e Orikumit, ky shtetas dyshohet se ka tentuar të vjedhë një automjet tip “Jeep”.

Strukturat hetimore të Komisariatit të Policisë Vlorë vijojnë punën për zbardhjen e rasteve të tjera të vjedhjes që mund të jenë kryer nga këta shtetas.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme”.