Italia arreston dy persona të dyshuar për spiunazh për Rusinë, 5 të tjerë nën hetim

Italia ka arrestuar dy persona, përfshirë një ish-anëtar të shërbimeve të saj të inteligjencës, për dyshimin se i kanë kaluar informacione të klasifikuara një agjenti rus.

Prokurorët thanë se i dyshuari kryesor, ishte një ish-oficer 59-vjeçar në policinë ushtarake të Karabinierëve, i cili kishte punuar si pjesë e komunitetit të inteligjencës. Akuzat përfshijnë transferimin e informacionit të mbrojtur, si dhe akses të paautorizuar në shërbimet e IT-së dhe telekomunikacionit.

Pesë persona të tjerë janë vënë nën hetim si pjesë e një hetimi të nisur në maj 2025. I dyshuari kryesor akuzohet për marrjen e parave për t’i kaluar një agjenti rus informacionin e marrë nga burimet e tij, të cilat përfshijnë katër anëtarë në detyrë të ushtrisë italiane.

Operativi rus, i cili dyshohet se është i përfshirë, mbrohet nga imuniteti diplomatik në Itali. Ministri italian i Mbrojtjes, Guido Crosetto, tha se hetimi ndihmoi në zbulimin e qëndrimit të vërtetë të Rusisë ndaj Italisë, ku qeveria i ka ofruar ndihmë ushtarake dhe civile Ukrainës që kur ajo u pushtua nga Rusia në vitin 2022.

“Kjo luftë hibride është maja e një ajsbergu gjigant, që përfshin armiq të jashtëm dhe tradhtarë të brendshëm, të cilët janë të përgatitur ta shesin kombin e tyre për para, pushtet ose përfitime personale”, shkroi Crosetto në X.

Në vitin 2021, kapiteni i marinës italiane Walter Biot u arrestua ndërsa po i dorëzonte dokumente një punonjësi të ambasadës ruse në një parking makinash në Romë dhe më vonë u dënua me gati 30 vjet burg.