Ja dëshmitë se Rusia bombardon Ukrainën
Shtetet e Bashkuara të dielën publikuan imazhet satelitore të cilat, sipas tyre, dëshmojnë se Moska nga territori rus bombardon pozicionet e ushtrisë ukrainase.
Katër fotografi tregojnë pjesë të kufirit Ukrainë-Rusi. Dy tregojnë një grup të raketahedhëseve, për të cilat amerikanët thonë se gjenden në territorin rus.
Në imazhet satelitore shihen edhe krateret në tokë pranë pozicioneve ushtarake në anën ukrainase të kufirit.
Në të tretën shihet armatimi i rënd nga Rusia, për të cilën amerikanë thonë se separatistët prorusë e fusin brenda Ukrainës, transmeton Telegrafi.
“Moska, për më shumë ka në plan t’u dërgojë rebelëve raketahedhës më të mëdhenj dhe më të fuqishëm”, ka thënë zëdhënësja e DSH-së, Marie Harf, duke u thirrur në shërbimet amerikane të zbulimit.
Sipas saj, të dhënat amerikane sugjerojnë se pas rënies së aeroplanit të Malajzisë më 17 korrik, armët vazhdojnë ta kalojnë kufirin drejt Ukrainës.
Moska, në anën tjetër, mohon përfshirjen e saj në konfliktin ukrainas duke akuzuar Washingtonin se po bën propagandë kundër tyre.
