Jabllanoviq: Barrikadën në Ibër e heqin vetëm serbët e veriut

Në Qendrën mediale në Çagllavicë është mbajtur një tryezë në të cilën është folur për situatën në Kosovë, me theks të posaçëm për gjendjen në veriun e saj.

Në tryezë, marrin vesh burime të Koha.net, ka marrë pjesë edhe lideri i Listës serbe, Aleksandar Jabllanoviq, ish-ministër për Kthim e komunitete në Qeverinë e Kosovës, i cili u shkarkua nga ky post pas fyerjeve që ua bëri nënave të viktimave të luftës në Gjakovë dhe pas protestave të mëdha të qytetarëve të Kosovës.

Jabllanoviq, duke folur për barrikadën në lumin Ibër që ndan jugun e veriun e Mitrovicës, tha se atë barrikadë mund ta heqin vetëm ata që e kanë vendosur, pra serbët e veriut.

“Barrikadën nuk mund ta heqin as Edita Tahiri, as Agim Bahtiri e as Goran Rakiq, atë mund ta heqin vetëm ata që e kanë vendosur ”, ka thënë Jabllanoviq duke aluduar në paralajmërimet e bëra nga kryetarët e komunave të të dy pjesëve të Mitrovicës se barrikada “Parku i Paqes” mund të hiqet së shpejti.