Japoni, ndëshkim ekstrem me braktisje në pyll për 7-vjeçarin

Rreth 75 ushtarë japonezë i janë bashkuar kërkimeve për djalin 7-vjeçar, që është zhdukur prej 5 ditësh pasi prindërit e braktisën në një pyll, si formë ndëshkimi.

Veç ushtarëve, rreth 200 policë dhe vullnetarë janë angazhuar në kërkimet për Jamato Tanokën, i cili u zhduk të shtunën në një zonë malore në afërsi të qytetit Hakodate.

Në fillim, prindërit e tij thanë se ai u zhduk ndërsa ata po shëtisnin në pyll, por më pas pranuan se e kishin lënë vetëm në rrugë, në mënyrë që ta ndëshkonin pasi ishte sjellë keq.

Prindërit e djaloshit të vogël thanë se, pasi e lanë vetëm u larguan rreth 500 metra dhe, kur u kthyen disa minuta më vonë, ai ishte zhdukur.

Zona në fjalë është shumë e izoluar dhe njihet për popullimin e madh të arinjve që jetojnë aty. Banorët lokalë thonë se, shumë rrallë kalojnë përmes pyjeve, pasi nuk ka ndriçim dhe ka shumë kafshë të egra.

Kërkimet për 7-vjeçarin kanë tërhequr vëmendjen e të gjithë Japonisë, ndërsa shumë njerëz kanë kritikuar ashpër përmes rrjeteve sociale prindërit e tij që e braktisën në mes të pyllit.