Kallëzimi penal ndaj ministrit të Financave, reagon Edi Rama: Pushteti gjyqësor s’mund të hapë derën e thesarit

Kryeministri Edi Rama ka reaguar lidhur me kallëzimin penal të depozituar nga gjyqtarët ndaj ministrit të Financave, për moszbatimin e ekzekutimit për rritjen e pagave të tyre.

Rama shkruan se ministri pret me ligj e me zakon Kuvendin e Shqipërisë që të shprehet për vendimin e Gjykatës Kushtetuese.

Sipas kryeministrit Rama, pushteti gjyqësor s’mund të hapë derën e thesarit.

“Kallëzimi penal i gjykatësve për Ministrin e Financave pse nuk lejon që ata të hapin derën e thesarit për rritjen e pagave të tyre, ndërkohë që ministri pret me ligj e me zakon Kuvendin e Shqipërisë që të shprehet për vendimin e Gjykatës Kushtetuese, ka vetëm një mangësi: Mungon emri im dhe ai i ministrit të drejtësisë, sepse Ministri i Financave është konsultuar paraprakisht me ne për qëndrimin e tij, për të cilin edhe skuadrat tona juridike kanë shprehur unanimisht qëndrimin se pushteti gjyqësor nuk mund të hapë derën e thesarit të shtetit. Vetëm parlamenti mund ta bëjë këtë,” shkruan në rrjetin ‘X’, kreu i qeverisë.

Kryeministri nënvizon se rritja e pagave do të bëhet vetëm përmes rrugës kushtetuese dhe ligjore.

“Kaq kisha dhe nuk dua të zgjatem me çfarë mendoj për tërë këtë historinë bajate të vetërritjes së rrogave, nga kategoria më e mirëpaguar e Republikës së Shqipërisë. Por për sa më takon asgjë nuk ndryshon, pagat do të rriten me vendim të Kuvendit të Shqipërisë dhe në respekt të plotë të vendimit të Gjykatës Kushtetuese”, përfundon Edi Rama.

Kallzimi penal i gjykatësve për Ministrin e Financave pse nuk lejon që ata të hapin derën e thesarit për rritjen e pagave të tyre, ndërkohë që ministri pret me ligj e me zakon Kuvendin e Shqipërisë që të shprehet për vendimin e Gjykatës Kushtetuese, ka vetëm një mangësi: Mungon…

— Edi Rama (@ediramaal) September 10, 2026