Khamenei: “Forcat armike” do të dëbohen së shpejti nga Deti Arab

Udhëheqësi suprem iranian, Ajatullah Ali Khamenei, ka deklaruar se “forcat armike” që ndodhen në Detin Arab do të “dëbohen nga ky rajon në një të ardhme të afërt”. “Ata vijnë nga shumë larg dhe harxhojnë energjinë e tyre për këtë rrugë të gjatë. Ata me siguri do të dëbohen nga ky rajon në një të ardhme të afërt,” u shpreh Khamenei, duke iu referuar ndërtimit ushtarak amerikan në rajon, siç njofton Al Jazeera.

Ai theksoi se fjalët e tij i drejtoheshin “armiqve të kombit iranian”. Ndërkohë, ministri i Jashtëm iranian deklaroi se Teherani është “plotësisht i përgatitur” t’i përgjigjet çdo sulmi, përfshirë një sulm të mundshëm izraelit, teksa përpjekjet diplomatike për t’i dhënë fund luftës vazhdojnë.

Komentet e Khameneit vijnë në një kohë tensioni të lartë për Ngushticën e Hormuzit. Irani ka sekuestruar së paku 12 anije mallrash në Ngushticë në ditët e fundit, me arsyetimin se transportonin drogë dhe karburant kontrabandë, ndërsa ushtria amerikane ka stacionuar një aeroplanmbajtëse dhe asete të tjera detare në rajon.

Presidenti amerikan Donald Trump ka kërcënuar se do ta sulmojë Iranin nëse nuk arrihet një marrëveshje e re për programin bërthamor të vendit, një kërcënim që Teherani e konsideron presion për t’u nënshtruar kërkesave të njëanshme të Uashingtonit.