KIEV – Zelensky: Mungesa e fondeve rrezikon financimin e blerjes së dronëve

KIEV, 25 shtator /ATSH-DPA/- Presidenti ukrainas Volodymyr Zelensky ka paralajmëruar se mungesa prej më shumë se 23 miliardë eurosh në buxhetin e Ukrainës, po rrezikon financimin e blerjes së dronëve, të cilët janë të rëndësishëm për luftën kundër Rusisë.

“Nëse nuk i porosisim dhe nuk i paguajmë në tetor dhe nëntor, do të kemi probleme serioze në janar dhe shkurt”, tha sot Zelensky para gazetarëve në Kiev.

Sipas tij, pak më shumë se një e treta e shumës që mungon në buxhet, lidhet me blerjen e dronëve për tre muajt e parë të vitit 2027.

Zelensky i kërkoi Komisionit Evropian që të përshpejtojë transferimin e kësteve të ardhshme nga një kredi prej 90 miliardë eurosh, e vënë në dispozicion të Ukrainës në prill.

Ukraina po lufton kundër pushtimit të plotë rus, që nga shkurti i vitit 2022 dhe mbështetet financiarisht dhe ushtarakisht nga vendet perëndimore.

Dronët me rreze të gjatë veprimi, përdoren nga ushtria ukrainase për të goditur vazhdimisht, veçanërisht, objekte të industrisë ruse të naftës, me synimin për ta bërë më të vështirë financimin e luftës nga Rusia. /