Kim Yong Un i tregon dhëmbët Trump/ SHBA merr masa, por tërbohet Kina
Një ditë pasi i hodhën katër raketa balistike, tre prej të cilave kanë arritur shumë pranë Japonisë, vetëm 190 milje larg bregdetit, Koreja e Veriut kërcënon hapur SHBA-të dhe thotë se raketat ishin destinuar për bazën e tyre ushtarake në Japoni.
“Daily Mail” raporton se “Sot Pheninai zyrtar ka marrë përsipër sulmin e djeshëm dhe se kjo është një mënyrë e re e tregimit të forcës ndaj SHBA-ve e aleatëve të tyre japonezë”. Po sot regjimi publikoi edhe një foto të diktatorit Jong-Un teksa duartrokiste hedhjen e raketave, duke zbardhur dhëmbët.
Fill pas kësaj, mësohet se kryeministri japonez Shinzo Abe ka telefonuar presidentin e SHBA-ve, Donald Trump për ta lajmëruar se kërcënimi i Koresë së Veriut kishte hyrë “në një fazë të re”.
Sakaq, Uashingtoni dhe Seuli ranë dakord për të ngritur një sistem mbrojtës nga raketat të quajtur THAAD në Korenë e Jugut, e cila në fakt ka tërbuar Kinën, aleatin kryesor diplomatik të Koresë së Veriut, që përpiqet shpeshherë ta bindë për të ndryshuar mënyrat e lojës.
Kina zyrtare tha se një ndërhyrje e tillë e SHBA përbën një “kërcënim të qartë, të pranishëm dhe thelbësore për sigurinë e tyre”.
Pritet që për këtë rast të mblidhet urgjentisht nesër edhe Këshilli i Sigurimit të OKB-së.
