Kina dhe Gjermania mbështesin multilateralizmin në zgjidhjen e çështjeve globale

I dërguari i posaçëm i presidentit kinez Xi Jinping, Yang Jiechi, u takua të hënën me kancelaren gjermane Angela Merkel para Konferencës së Berlinit për Libinë. Të dy palët u zotuan të mbështesin multilateralizmin në zgjidhjen e çështjeve ndërkombëtare.

Yang, drejtor i Zyrës së Komisionit për Punët e Jashtme të Komitetit Qendror të PKK-së, kryeson delegacionin e Kinës pjesëmarrës në konferencën ndërkombëtare.

Përballë një situate globale komplekse dhe në ndryshim, Kina dhe Gjermania, si dy vende të rëndësishme të botës, duhet të respektojnë njëra-tjetrën, të forcojnë bashkëpunimin, të zbatojnë bashkërisht multilateralizmin, të bashkohen për të trajtuar sfidat globale dhe të vijojnë të promovojnë një zhvillim të shëndetshëm e të qëndrueshëm të lidhjeve dypalëshe, tha Yang Jiechi.

Duke vënë në dukje se Kina është e gatshme të ruajë shkëmbimet e ngushta të nivelit të lartë me Gjermaninë, Yang tha se pala kineze vlerëson përpjekjen e Merkelit për të nxitur në mënyrë aktive BE-në që të forcojë bashkëpunimin me Kinën.

Kina është e gatshme të punojë me Gjermaninë dhe udhëheqjen e re të institucioneve të BE-së për të çuar përpara partneritetin e gjithanshëm strategjik Kinë-BE.

Nga ana e saj, Merkeli shprehu mirënjohjen ndaj presidentit Xi për dërgimin e një delegacioni në Konferencën e Berlinit për Libinë, duke thënë se ajo vlerëson mbështetjen e Kinës për multilateralizmin dhe bashkëpunimin ndërkombëtar, si dhe rolin konstruktiv të Kinës në trajtimin e çështjeve ndërkombëtare dhe rajonale.

Merkeli vuri në dukje që ajo do të punojë në mënyrë aktive për përmirësimin dhe zhvillimin e marrëdhënieve mes Gjermanisë e Kinës dhe po përgatitet për një varg veprimtarish të rëndësishme politike mes dy vendeve dhe mes BE-së e Kinës që do të zhvillohen këtë vit.

Kancelarja shtoi se ajo do të mbajë kontakte të ngushta me palën kineze për të siguruar që këto veprimtari të kenë rezultate pozitive.