Kina, paradë madhështore për fitoren në Luftën II Botërore ( Foto )
Në Kinë është mbajtur një paradë madhështore për të kujtuar fitoren ndaj Japonisë në Luftën e Dytë Botërore, duke treguar se fuqia ushtarake e Pekinit ka arritur një nivel të paprecedent.
Presidenti Xi Jinping, në fjalimin e hapjes së ceremonisë nderoi popullin kinez, “që në mënyrë të palodhur luftoi dhe mposhti agresionin e Japonisë”.
Ai tha gjithashtu se Ushtria Çlirimtare e Popullit do të reduktohet me 300 mijë njësi, por nuk tha një datë të saktë se kur kjo do të ndodhë.
Rritja e fuqisë ushtarake të Kinës po shihet me shqetësim në Azinë jug-lindore, ku së fundmi janë verifikuar jo pak tensione rajonale.
Kina është përfshirë në një seri përplasjesh territoriale me fqinjët e saj në Detin e Jugut, si dhe me Japoninë në Detin Lindor.
Në prag të nisjes së paradës, Shtetet e Bashkuara deklaruan se pesë anije kineze ishin parë në brigjet e Alaskës, për herë të parë.
Mbi 30 zyrtarë të huaj, përfshirë këtu ministra dhe krerë shtetesh, si presidenti rus Vladimir Putin dhe sekretari i përgjithshëm i OKB-së Ban Ki Moon morën pjesë në këtë event.
Por shumë liderë të tjerë, përfshirë këtu kryeministrin japonez Shinzo Abe nuk morën pjesë në të.
