“Kisha dashtë me qenë në vendin e tyre” — Ish-luftëtarja e UÇK-së Elheme Hetemi për mbështetjen që po u jepet ish-krerëve të UÇK-së

Ish-luftëtarja e UÇK-së, Elheme Hetemi, ka folur mbrëmë në emisionin “Shoqet” në Klan Kosova për përvojën e saj gjatë luftës dhe për mbështetjen e madhe që po u jepet ish-krerëve të UÇK-së në Hagë, siç njofton Klan Kosova.

Hetemi kujtoi respektin që gratë pjesëtare të UÇK-së gëzonin gjatë luftës, si nga popullata ashtu edhe nga ushtarët e tjerë, një respekt që, sipas saj, është dëshmi e sakrificës së përbashkët për lirinë.

Duke folur për mbështetjen që po u jepet ish-krerëve të UÇK-së në Hagë, ajo tregoi edhe një bisedë që kishte pasur me motrën e saj para se të vinte në emision. “Ma kisha dashtë unë me kanë në vend të tyre kur e shoh çka po bën populli për ta, për ta dhe për vete”, i tha ajo.

Hetemi u shpreh se protestuesit po i nderojnë jo vetëm ish-krerët e UÇK-së, por edhe veten dhe kombin shqiptar, duke theksuar se kjo valë mbështetjeje është reflektim i vlerave për të cilat u luftua.

“Domethënë është si një familje kur len trashëgimtarë që e nderojnë edhe respektojnë. Këta njerëz po i bëjnë nderë krerëve të shtetit të vet, po i bëjnë nderë kombit edhe po i bëjnë nderë të gjithë shqiptarëve kudo nëpër botë”, u shpreh ajo në emision.