Koçiu në Azerbajxhan, Shqipëria në Forumin Botëror Urban 2026

Do të zhvillohet këtë të hënë në Baku të Azerbajxhanit Forumi Botëror Urban 2026, ku pjesë e këtij aktiviteti është edhe zëvendëskryeministrja Albana Koçiu.

Forumi, i organizuar nga Presidenti i Azerbajxhanit, Ilham Aliyev, bën së bashku liderë botërorë, përfaqësues të institucioneve ndërkombëtare, ekspertë dhe politikëbërës për të diskutuar mbi sfidat dhe zgjidhjet që lidhen me urbanizimin, zhvillimin e qëndrueshëm dhe të ardhmen e qyteteve.

Mësohet se Koçiu në këtë forum do të theksojë rëndësinë e ndërtimit të qyteteve të sigurta, rezistente dhe gjithëpërfshirëse përballë sfidave globale të strehimit, urbanizimit dhe ndryshimeve klimatike.

Gjithashtu, zëvendëskryeministrja do të ndajë eksperiencën e transformimit urban të Tiranës dhe zbatimin e programit kombëtar “Rilindja Urbane”. Zëvendëskryeministrja do të prezantojë prioritetet e Shqipërisë për zhvillimin urban të së ardhmes, të fokusuara në forcimin e rezistencës ndaj ndryshimeve klimatike, investimet në cilësinë urbane dhe avancimin e iniciativës “Smart City”, përmes përdorimit të teknologjisë dhe sistemeve inteligjente.