Kolona në Morinë: çdo automjet që hyn nga Kosova në Shqipëri po kontrollohet

Kolona të gjata automjetesh janë krijuar të shtunën në pikën kufitare të Morinës, mes Kosovës dhe Shqipërisë, pasi zyrtarët kufitarë po kontrollojnë çdo automjet që hyn nga Kosova drejt Shqipërisë, siç njofton Botapress.

Sipas raportimit të Botapress, të gjitha automjetet i nënshtrohen kontrollit nga zyrtarët, ndërsa kësaj radhe në disa raste po kryhen kontrolle edhe brenda vetë automjeteve. Nga zyrtarët kufitarë nuk është dhënë asnjë informacion zyrtar për arsyen e këtyre kontrolleve të shtuara.

Siç raporton edhe Fiks.al, një masë e tillë mund të jetë marrë nga autoritetet e Shqipërisë për shkak të protestave të dhunshme që po zhvillohen prej pesë ditësh në kryeqytet dhe në qytete të tjera të vendit, por kjo lidhje nuk është konfirmuar zyrtarisht.

Nxënës e studentë po protestojnë për të pestën ditë radhazi në Shqipëri. Protesta nisi para Ministrisë së Arsimit dhe u përshkallëzua në përplasje me Policinë, me hedhje gurësh e sendesh drejt objekteve publike e private. Protestuesit kundërshtojnë rritjen e kostove të arsimit dhe korrupsionin dhe kërkojnë dorëheqjen e kryeministrit Edi Rama, i cili ka deklaruar se nuk do të largohet nga detyra.

Gjatë katër ditëve të para të protestave janë arrestuar mbi 150 të rinj, ndërsa të premten u raportua se dy të rinj nga Kosova ishin arrestuar si pjesëmarrës në aktet e dhunës gjatë protestave në Tiranë; ata kishin deklaruar për mediat shqiptare se kishin ardhur nga Prishtina për të protestuar kundër qeverisë shqiptare.