Konferenca Ndërqeveritare në Bruksel, Gjermania dhe Holanda konfirmojnë mbështetjen për Shqipërinë

Përfaqësitë diplomatike të Gjermanisë dhe Holandës kanë reaguar me një mesazh të unifikuar lidhur me zhvillimin e Konferencës së 8-të Ndërqeveritare mes Shqipërisë dhe Bashkimit Evropian. Përmes deklaratave zyrtare, ambasadori gjerman Karl Bergner dhe ai holandez Reinout Vos kanë vlerësuar arritjen e objektivave të ndërmjetme në grupkapitullin “Themelorët” (Fundamentals), duke paralajmëruar njëkohësisht se ritmi i anëtarësimit do të diktohet ekskluzivisht nga performanca e shtetit ligjor.

Të dy diplomatët vlerësuan angazhimin e administratës, politikës dhe drejtësisë shqiptare në përmbushjen e standardeve bazë, duke rikonfirmuar mbështetjen e Berlinit dhe Hagës për anëtarësimin e Shqipërisë në familjen evropiane. Megjithatë, ata theksuan se miratimi i Raportit të Vlerësimit të Kushteve të Ndërmjetme (IBAR) nuk është një pikëmbërritje, por fillimi i një monitorimi.

”Arritja e objektivave të ndërmjetme në grupkapitullin ‘Fundamentals’ përbën një hap të rëndësishëm në procesin e anëtarësimit të Shqipërisë në Bashkimin Evropian. Dakordësia për IBAR-in është shprehje e pritshmërisë dhe inkurajimit tonë të qartë për vijimin e reformave, zbatimin e tyre me vendosmëri në praktikë dhe konsolidimin e institucioneve përgjegjëse,” deklaroi Ambasadori i Gjermanisë, Karl Bergner.

Sipas përfaqësuesve evropianë, një demokraci pluraliste dhe mbrojtja e të drejtave themelore mbeten thelbi i vlerave evropiane që do të përcaktojnë shpejtësinë e integrimit të Tiranës zyrtare.

Në deklaratat e tyre, Gjermania dhe Holanda kanë vendosur theksin te vijimësia e goditjes së pandërprerë të pandëshkueshmërisë, duke i cilësuar rezultatet në këtë drejtim si parakushte absolute për mbylljen e bisedimeve. Një mesazh i drejtpërdrejtë u dha edhe për procedurat e trajtimit të imuniteteve politike nga ana e institucioneve shqiptare.

“Respekti për pavarësinë e gjyqësorit dhe përpjekjet e pakufizuara kundër korrupsionit, përfshirë rastet e nivelit të lartë, janë parakushte të panegociueshme për përparimin e Shqipërisë në procesin e pranimit në BE. Kjo gjithashtu përfshin sigurimin që vendimet për heqjen e imunitetit të merren në përputhje me rekomandimet e Komisionit të Venecias,” nënvizoi Ambasadori i Mbretërisë së Holandës, Reinout Vos.