Konferenca për Ditën e Rinisë, të pranishëm Rama e Berisha

Një konferencë e organizuar nga presidenti Bujar Nishani po mbahet në Tiranë, me rastin e Ditës Kombëtare të Rinisë, që shënoi rënien e regjimit komunist 25 vjet më parë.

Të pranishëm në këtë event janë ish-kryeministri Berisha, eksponentë të mazhorancës, si dhe përfaqësues të trupit diplomatik në Tiranë dhe eurodeputetë.

Në fjalën e tij, ish-kryeministri Berisha ka vënë në dukje se deri 25 vjet më parë, Shqipëria kishte qenë vendi komunist më i izoluar në Europë.

Ndërsa tani, sipas tij, Shqipëria ka nisur rrugëtimin e integrimit në Bashkimin Europian, për të qenë pjesë e familjes së bashkuar europiane.

Por, në fjalën e tij, Berisha ka vlerësuar se Shqipëria përballet sot edhe me shumë sfida, sidomos korrupsioni dhe krimi i organizuar, fenomene që sipas tij duhet të çrrënjosen sa më parë.

Ndërsa kryeministri Edi Rama, në fjalën e tij ka nënvizuar gjithashtu se, Shqipëria kishte sistemin komunist më barbar në Europë, që dallonte nga të tjerët për nga brutaliteti i tij.

Rama ka vënë në dukje se, Shqipëria duhet ta ndërtojë të ardhmen e saj duke marrë si shembull historinë institucionale europiane.

“Mësimi i parë për të nxjerrë nga këto vite, për të shkuarën dhe sfidën është se dallimin nuk e bën historia e shkuar apo e njerëzve, por tradita e institucioneve”, ka thënë Rama.

“Ne ende nuk jemi ende në atë stad ku kundërshtari të pranohet si pjesë e atij diversiteti ku kemi hyrë. Sot nuk kemi një asgjësim politik, sikurse ndodhte në diktaturë, por një riciklim të përditshëm të realitetit politik, që është reflektim i së shkuarës”, ka shtuar kryeministri.