Konfindustria kundër TVSH për makineritë: Goditje për investimet

Industrialistët mbështesin vendimin e Komisionit parlamentar të Ekonomisë për të shmangur pagesën e TVSH për makineritë dhe pajisjet, të parashikuar në projektligjin e paraqitur nga Ministria e Financave.

Nëpërmjet një njoftimi për shtyp, Konfindustria bën të ditur se rikthimi i TVSH për makineri dhe pajisje, që i shërbejnë procesit të prodhimit, do të ishte goditje e rëndë për investimet e vendit dhe të huaja.

Sipas Konfindustrisë, veçanërisht të prekur do të ishin investimet në vazhdim, që rrezikojnë të dështojnë, për shkak të rritjes së paparashikuar të kostove, duke krijuar në këto raste edhe shkaqe për penalizime të mundshme të shtetit shqiptar në gjykatat e vendit dhe ndërkombëtare.

Njëkohësisht me pagesën e TVSH prej 20% për makineri dhe pajisje goditje të drejtpërdrejtë do të merrte edhe fuqia konkurruese e prodhimeve vendore krahësimisht atyre të huaja, me pasoja të rënda për ekonominë kombëtare.