Konkurrenca heton tregun e furnizimit me karburant të avionëve

Autoriteti i Konkurrencës ka hapur një hetim të thelluar në tregun e furnizimit me karburant të avionëve në aeroportin e Tiranës.

Që prej dhënies së aeroportit me koncesion, ky treg është monopol dhe në të vepron vetëm një ndërmarrje, AIR BP ALBANIA, në bazë të marrëveshjes me kompaninë koncesionare Tirana International Airport.

Nga hetimi paraprak, Autoriteti ka konstatuar se gjatë vitit 2015 fitimi pas tatimit i kompanisë AIR BP ALBANIA është i konsiderueshëm, nëse krahasohet me tregun e karburanteve në vend. Kjo kompani është e vetmja që zotëron depozita karburanti në territorin e aeroportit.

Në teori, ajo mund të ofrojë kapacitete depozituese edhe te subjekte të tjerë, sepse nuk mban më të drejtë ekskluzive që nga fundi i vitit 2014.

Megjithatë, çmimet që AIR BP kërkon nga kompanitë e tjera nuk janë të rregulluara, ndaj, deri më sot, asnjë subjekt tjetër nuk ka lidhur kontratë për të ofruar furnizim me karburant për avionët dhe mjetet e tjerë fluturues që përdorin Aeroportin e Tiranës.

Mbështetur në këto të dhëna, Autoriteti i Konkurrencës ka vendosur të hapë një hetim për periudhën janar 2014 – qershor 2016, hetim që duhet të mbyllet brenda dy muajsh.