Kontrolle me dronë dhe radarë në Dibër, mbi 1.000 gjoba në një javë, arrestohen 2 shoferë të dehur

Drejtoria Vendore e Policisë së Dibrës, së bashku me stacionet e policisë së Peshkopisë, Bulqizës, Matit dhe Klosit, kanë kryer gjatë javës së fundit kontrolle me dronë, radarë inteligjentë, patrulla dhe pika kontrolli në të gjitha akset rrugore të qarkut të Dibrës, siç njofton Shqiptarja.com, me synim parandalimin e aksidenteve rrugore.

Gjatë këtyre kontrolleve janë vendosur mbi 1.000 masa administrative në vetëm një javë. Po ashtu, policia pezulloi 8 leje drejtimi dhe bllokoi 30 automjete, ndërsa dy shoferë u arrestuan në flagrancë për drejtim mjeti në gjendje të dehur dhe një shofer tjetër u procedua në gjendje të lirë.

Shkeljet kryesore të konstatuara gjatë kontrolleve ishin parakalimet e gabuara, ndalimi dhe qëndrimi i parregullt, drejtimi i mjetit nën efektin e alkoolit, përdorimi i telefonit celular gjatë drejtimit të mjetit, mosvendosja e rripit të sigurimit dhe tejkalimi i shpejtësisë së lejuar.

Policia e Dibrës u ka bërë apel drejtuesve të mjeteve të respektojnë kufijtë e shpejtësisë, të mos parakalojnë aty ku ndalohet, të mos përdorin telefonin gjatë drejtimit të mjetit, të mos drejtojnë mjetin pasi kanë konsumuar alkool dhe të vendosin rripin e sigurimit. Kontrollet do të vijojnë me intensitet të shtuar, me fokus në akset kryesore, në zonat urbane dhe në zonat pranë shkollave.