Korçë, PD denoncon ndërtimin e një objekti para teatrit “Çajupi”

Ndërtimi i një objekti fantazmë para teatrit “Çajupi” në Korçë ka sjellë denoncimin e Partisë Demokratike, e cila pas shqetësimit të qytetarëve, ka reaguar përmes koordinatorit ligjor të saj në këtë qytet, Ervin Salianji.

Ky i fundit ka kërkuar informacione pse po ndërtohet ky objekt dhe si është dhënë leja për të prishur një prej shesheve kryesore dhe tradicionale të qytetit.

“Kjo që po ndodh këtu, në një prej dy shesheve kryesore të qytetit, është simboli i vërtetë i kësaj qeverisjeje, – tha Salianji. – Qytetarët korçarë nuk e dinë pse ka mbirë ky ndërtim. Nuk ka asnjë tabelë se nga kush dhe se çfarë është ky rrethim në mes të qytetit. Partia Demokratike dënon këtë arrogancë dhe papërgjegjshmëri të strukturave qeveritare vendore dhe qendrore, të cilat kanë të njëjtën mendësi për mënyrën e funksionimit të vendit. Kjo bëhet për interesa klienteliste të qeverisë dhe miqve të saj në kurriz të qytetit të Korçës”.