Kosova në hapa të sigurt drejt Bashkimit Evropian

Holanda dhe Sllovakia premtuan se do të mbështesin Kosovën drejt proceseve integruese. Shtetet anëtare të BE-së porositën Kosovën që të vazhdojë luftën kundër krimit e korrupsionit e të fokusohet në rrugën drejt përafrimit me Bashkimin Europian, përfaqësues të së cilit, thanë se puna e institucioneve të Kosovës, kohët e fundit është duke u zhvilluar në mënyrë intensive.

Në konferencën e organizuar sot në Prishtinë, nga Ministria për Integrime, drejtuesi i saj, Bekim Çollaku tha se Kosova po arrin një transformim shumë pozitiv në proceset integruese, edhe pse rruga e Kosovës drejt BE-së është shumë e komplikuar, krahasuar me vendet e tjera të Ballkanit Perëndimor.

Ministri Çollaku, gjatë konferencës së organizuar në bashkëpunim me Ambasadën e Holandës në Kosovë, që për qëllim pati prioritetet e presidencës së Mbretërisë së Holandës në Këshillin e BE-së, me fokus të veçante Ballkanin Perëndimor dhe Kosovën, tha se me gjithë sfidat që po përballet Bashkimi Evropian, nuk ka zbehje të interesimit të BE-së për zhvillimin e vendeve të rajonit, përshirë këtu Kosovën.

Ai foli për arritjet e Kosovës në proceset integruese, në veçanti për zbatimin e MSA-së dhe lëvizjen e lirë, duke thënë se Kosova ka shënuar hapa shumë pozitiv drejt perspektivës europiane.

Çollaku tha se kanë në fokus zbatimin e plotë të MSA-së brenda afatit të përcaktuar.
Ai bëri të ditur se po synojnë që gjatë mandatit të institucioneve të tanishme të BE-së, Kosova të aplikojë për statusin e vendit kandidat për anëtarësim në Bashkim Evropian.

Sipas tij, nëse vazhdohet me reforma të tilla, mbështetje të qytetarëve, vendeve anëtare të BE-së dhe vet institucioneve të Bashkimit Europian, do të mund të arrihet një synim të tillë.

Shefi i zyrës së Bashkimit Europian në Kosovë, Samuel Zbogar tha se të arriturat e Kosovës në proceset integruese, janë rezultat konkret i punës së institucioneve të Kosovës.

Ai tha se institucionet e Kosovës duhet të vazhdojë të luftojë krimin e organizuar, korrupsionin dhe të çojë përpara marrëveshjen e demarkacionit me Malin e Zi, nëse duan që qytetarët të mund të lëvizin lirshëm në vendet e BE-së.

Ambasadorja e Mbretërisë së Holandës në Kosovë, Gerrie Willems duke u zotuar për mbështetje të fuqishme për Kosovën, tha se prioritet kanë forcimin e demokracisë dhe sundimin e ligjit.

Ajo tha se MSA do t’i mundësojë Kosovës që të ketë një kornizë të përgjithshme në rrugën drejtë BE-së. Ajo inkurajoi institucionet e Kosovës që të implementojnë reformat dhe të rrisin komunikimin me qytetarë.

Për mbështetje të madhe për Kosovën, drejt proceseve integruese, u shpreh edhe shefi i zyrës së Sllovakisë në Kosovë, L’ubomir Batary. Ai tha se fillimi i implementimit të MSA-së dhe marrja e rekomandimit të vizave, është vetëm fillimi i një faze të re që kërkon përkushtim.

Në konferencën e sotme u tha se Kosova është një partner i besueshëm në sytë e Bashkimit Evropian, ndaj edhe BE-ja vazhdon të jetë ndër donatorët më të mëdhenj tregtarë për Kosovën.

Përfaqësues të BE-së, dhe të vendeve anëtare, thanë se Kosova ka arritur progres në rrugën e saj drejt BE-së.