Kosovë-Mustafa takon komandantin e ri të KFOR-it, gjeneralmajorin Giovanni Fungo

Kryeministri i Republikës së Kosovës, Isa Mustafa, priti në takim njoftues komandantin e ri të KFOR-it, gjeneralmajorin Giovanni Fungo.

Gjatë takimit, kryeministri Mustafa e njoftoi për arritjet e Kosovës dhe për prioritetet e qeverisë në avancimin e gjithanshëm të progresit.

Kryeministri Mustafa shprehu vlerësimin maksimal të qytetarëve dhe të qeverisë së Kosovës për punën dhe kontributin e vazhdueshëm të KFOR-it në ofrimin e sigurisë dhe në fusha të tjera të zhvillimeve në vend.

Duke e falënderuar për përkrahjen e KFOR-it edhe në fuqizimin e FSK-së dhe në aspekte të tjera, kryeministri Isa Mustafa shprehu përkushtimin e plotë të qeverisë së Kosovës për thellimin e bashkëpunimit me KFOR-in.

Komandanti i KFOR-it, gjeneralmajori Giovanni Fungo, vlerësoi arritjet në Kosovë, duke shprehur mbështetjen e mëtejme të KFOR-it. Gjeneralmajori Fungo, po ashtu, theksoi përkushtimin e KFOR-it për bashkëpunim me qeverinë e Kosovës si dhe për angazhimin e tij në krijimin e një ambienti të sigurt në Kosovë.

Kryeministri Mustafa dhe gjeneralmajori Fungo kanë biseduar edhe për proceset tjera aktuale në Kosovë.