KQZ padit 76 numërues: Tjetërsuan votën
Komisioni Qendror i Zgjedhjeve vendosi të kallëzoje në prokurori 76 numërues të 24 qendrave të votimit në Qarkun e Tiranës për tjetërsimin e votës gjatë procesit të numërimit për zgjedhjet e 25 qershorit.
Pas rinumërimit të 68 qendrave të votimit në Qarkun e Beratit dhe Tiranës, me kërkesë të Partisë Drejtesi Integrim dhe Unitet, Partisë Socialiste dhe Partisë Demokratike, anëtarët e KQZ-së gjykojnë se vetëm në 24 kuti të rinumëruara të Tiranës ka patur shkelje gjatë procesit të numërimit, sidomos nga numëruesit e parë.
Rastet e shkeljeve kanë qenë të ndryshme, megjithatë KQZ vendosi që të mos bëjë diferencime për kallëzimin e tyre dhe vendosi t’ja referojë të gjitha ato prokurorisë për hetime të mëtejshme.
Rinumërimi i fundit që KQZ bëri në Qarkun e Tiranës, mandatet të cilit nuk janë shpërndarë ende zyrtarisht u kërkua nga PDIU, e cila arrinte mandatin për Shpetim Idrizin për 37 vota.
Kjo gjë nuk u arrit, por nxorri në dritë shkeljet e bëra nga numëruesit në dëm, apo në favor të partive. Ndërkohë, në mesnatë skadoi edhe afati për ankimimin e rezultatit të Tiranës në Kolegjin Zgjedhor nga PDIU, e cila vendosi që të mos e ankimojë atë.
Të mërkurën, Komisioni Qendror i Zgjedhjeve miratoi gjithashtu edhe kalimin e mandatit të Gjovalin Kadelit tek Zef Maci, si deputet i PD në Qarkun e Lezhës për kohën e mbetur të legjislaturës përpara 25 qershorit.
