Kuçi i LDK-së i bashkohet protestës: Erdhi për UÇK-në, vlerën më sublime të kombit

Ish-ministri i Brendshëm dhe ish-kryetari i Suharekës, Blerim Kuçi, iu bashkua natën e 6 tetorit protestës në sheshin e Prishtinës, e cila ka hyrë në natën e 13-të të kërkesës drejtuar Kuvendit për votimin në lexim të dytë të ndryshimeve në Ligjin për Dhomat e Specializuara, siç raporton Klan Kosova.

Kuçi, figurë e njohur e LDK-së, tha para protestuesve se prania e tij atje nuk ka lidhje me asnjë parti politike. “Sot unë nuk kam ardhur as për PDK-në, as për LDK-në, e as për Aleancën. Unë sot këtu kam ardhur për UÇK-në, si vlera më e madhe e jona”, deklaroi ai, duke shtuar se UÇK-ja është vlera më sublime e kombit.

Sipas tij, zgjidhja ideale do të ishte një konsensus ndërpartiak për çështjen e presidencës, por mbrojtja e UÇK-së është mbi gjithçka tjetër në këto momente. Ai foli gjithashtu për nevojën e një iniciative ligjore dhe të një strategjie kombëtare për këtë çështje, duke theksuar: “Kjo është peshorja më e madhe që ka pas Kosova.”

Protesta vazhdoi deri në orët e vona të mbrëmjes para objektit të Kuvendit, ku forcat e policisë kishin ngritur kordona sigurie, ndërsa deputetët qëndronin brenda objektit. Protestuesit kërkojnë që Kuvendi të votojë në lexim të dytë amendamentet që prekin funksionimin e Dhomave të Specializuara.