Kumbaro siguron: Cirku i Tiranës nuk do të lëvizë

“Cirku Kombëtar nuk do të zhvendoset, por do të vazhdojë aktivitetin e tij të zakonshëm artistik në të njëjtin vend ku ka qenë edhe më parë. Cirku do vazhdojë të qëndrojë në funksion të aktivitetit të tij, deri sa të gjejmë një zgjidhje të re”.

Kështu shprehet Ministrja e Kulturës, Mirela Kumbaro, një ditë pasi artistët protestuan kundër ekzekutimit të vendimit të përmbarimit për t’i kthyer pronarit një sipërfaqe trualli prej 409 metra katrorë, pjesë e 1.500 metrave katrore të arenës së cirkut.

Kumbaro premtoi se do t’i japë zgjidhje konfliktit mes pronarit të truallit dhe drejtuesve të Cirkut Kombëtar, ndonëse dosja është gati për proces.

Drejtuesit e cirkut kanë protestuar në ditët e fundit që çadra të mos lëvizë. Prej vitesh ata pretendojnë për shkelje të ligjit, pasi sipas tyre, pronat ku kryhen aktivitete publike, nuk kthehen, por vetëm njihen ose kompensohen.