Kurti: Sot nisim komunikimet me opozitën për zgjedhjen e presidentit

Kryeministri Albin Kurti ka thënë sot se do të nisin komunikimet për takime me krerët e opozitës, në përpjekje për arritjen e një marrëveshjeje për zgjedhjen e presidentit të ri të vendit, siç njofton KosovaPress.

Komunikimet do të fillojnë menjëherë pas takimit që shefi i ekzekutivit ka sot me presidenten e Komisionit Evropian, Ursula von der Leyen.

“Posa të përfundojmë me takimin që kemi sot me presidenten e Komisionit Evropian, zonjën Ursula von der Leyen, menjëherë do të fillojmë komunikimet për takime me krerët e opozitës, në mënyrë që të mos jemi pa Kuvend më 7 tetor, por më së largu deri më 6 tetor ta kemi presidentin apo presidenten e re”, deklaroi Kurti për KosovaPress.

Deklaratën e bëri pas homazheve për ish-rektorin e Universitetit të Prishtinës “Hasan Prishtina”, Ejup Statovci, në 29-vjetorin e protestave studentore.

Afati kushtetues për zgjedhjen e presidentit të ri përfundon më 6 tetor. Nëse presidenti nuk zgjidhet brenda afatit, vendi përballet me zgjedhje të reja.