Kuvendi nesër në seancë, interpelancat dominojnë rendin e ditës

Parlamenti do të mblidhet të enjten në seancën e radhës plenare, ku rendi i ditës parashikon zhvillimin e gjashtë interpelancave të kërkuara nga deputetë të opozitës me anëtarë të kabinetit qeveritar, mes tyre edhe me kryeministrin Edi Rama.

Deputeti Agron Shehaj ka kërkuar një interpelancë me kreun e qeverisë lidhur me koncesionin e aksit Thumanë–Vorë–Kashar.

Dy interpelanca janë kërkuar me ministrin e Financave Petrit Malaj nga deputetët Agron Shehaj dhe Erald Kapri. Ato lidhen me të ardhurat e realizuara nga koncesionet dhe partneritetet publike-private gjatë vitit 2025, si dhe me ekzekutimin e detyrimeve financiare dhe mbledhjen e gjobës prej rreth 120 milionë eurosh ndaj Bankers Petroleum.

Ndërkohë, një grup deputetësh të Partisë Demokratike kanë kërkuar zhvillimin e një interpelance me ministrin e Brendshëm Besfort Lamallari lidhur me ngjarjen në Maliq, ku gjatë një operacioni policor për kapjen e një personi në kërkim humbi jetën efektivi i policisë Enea Mekolli.