Kuvendi nis sot punimet, jashtë parlamenti është thirrur protestë

Kuvendi i Shqipërisë rikthehet sot në punimet parlamentare pas pushimeve verore, duke çelur sesionin e ri të legjislaturës së 11-të. Deputetët do të mblidhen në sallën e seancave plenare në orën 17:00, në një seancë që pritet të ketë karakter kryesisht ceremonial.

Fjalën e hapjes do ta mbajë kryetari i Kuvendit, Niko Peleshi, ndërsa në vijim do të zhvillohen procedurat që lidhen me nisjen zyrtare të sesionit të ri.

Ende nuk është e konfirmuar nëse kryeministri Edi Rama do të marrë pjesë në seancën hapëse. Ndërkohë, lideri i opozitës, Sali Berisha, pritet të mungojë, pasi ndodhet në një vizitë në Shtetet e Bashkuara të Amerikës.

Sipas rendit të ditës të përcaktuar më herët, seanca do të përfshijë procedurat e zakonshme parlamentare që shoqërojnë nisjen e një sesioni të ri, si dhe miratimin e dokumentacionit të mbetur nga seanca e fundit plenare, e zhvilluar në fund të muajit korrik.

Përpara nisjes së seancës plenare, rreth orës 11:00, pritet të mblidhet Konferenca e Kryetarëve. Në këtë mbledhje do të diskutohen dhe miratohen projektprogrami i punës së Kuvendit dhe projektkalendari i punimeve për periudhën në vijim.

Sesioni i ri parlamentar pritet të jetë i ngarkuar politikisht, me reforma të rëndësishme në axhendë. Ndër çështjet që pritet të dominojnë diskutimet janë reforma zgjedhore dhe riorganizimi administrativo-territorial.

Veçanërisht kjo e fundit ka shkaktuar debate të forta politike dhe reagime në terren. Drafti i propozuar nga Partia Socialiste, që parashikon shkrirjen e 15 bashkive, është kundërshtuar nga opozita dhe grupe qytetarësh, të cilët kanë organizuar edhe protesta.

Ndërkohë, rikthimi i deputetëve në Kuvend pritet të shoqërohet edhe me një protestë jashtë godinës së Parlamentit. Protestuesit kanë paralajmëruar tubimin dhe kanë bërë thirrje për një reagim kundër deputetëve, duke paralajmëruar edhe hedhjen e vezëve dhe domateve.

Për shkak të protestës së paralajmëruar, pritet që Policia e Shtetit të marrë masa për garantimin e rendit dhe sigurisë gjatë zhvillimit të seancës së parë të sesionit të ri parlamentar.